Kash Main Chand Tu Tara Hota,
Falaak Py Aik Ashiyna Humara Hota,

Sb Tujhy Door  Door Sy Deikha Krty,
Pr Tujhy Milny Ka Haaq Sirff Humara Hota…!!!

Tu mili mujhe Facebook par
Pehchaan hui Twitter par
Love hua Whats app par
Shayari hui Internet par
An Talak de rahi hai Viber par.

tund mein aur aise kamsin ke liye
saqiya halki si la in ke liye
mujh se rukhsat ho mera ahad-e-shabab
ya khuda rakhna na us din ke liye
hai javani khud javani ka singar
sadagi gahana hai is sin ke liye
sab hasin hain zahidon ko napasand
ab koi hur aayegi in ke liye
vasl ka din aur itna mukhtasar
din gine jate the is din ke liye
sari duniya ke hain wo mere siva
main ne duniya chod di jin ke liye
lash par ibarat ye kahati hai ‘ameer’
aaye the duniya mein is din ke liye

Poet of the Poem/Ghazal or Nazam: Ameer Minai

tune ye phul jo zulfon mein laga rakha hai
ik diya hai jo andheron mein jala rakha hai
jit le jaye koi mujhko nasibon vala
zindagi ne mujhe da o pe laga rakha hai
jane kab aaye koi dil mein jhankane vala
is liye main ne gireban ko khula rakha hai
imtehan aur meri zabt ka tum kya loge
main ne dhadakan ko bhi sine mein chupa rakha hai

Poet of the Poem/Ghazal or Nazam: Qateel Shifai

yahin ke thi mohabbat ke sabaq ke ibtada main ne
yahin ke jurrat-e-izhar-e-harf-e-mudd’a main ne
yahin dekhe the ishv-e-naz-o-andaz-e-haya main ne
yahin pahale suni thi dil dhadakane ke sada main ne
yahin kheton mein pani ke kinare yaad hai ab bhi
dilon mein izdaham-e-arazu lab band rehte the
nazar se guftagu hoti thi dam ulfat ka bharate the
na mathe par shikan hoti, na jab tevar badalate the
khuda bhi muskura deta tha jab hum pyar karte the
yahin kheton mein pani ke kinare yaad hai ab bhi
wo kya aata ke goya daur mein jam-e-sharab aata
wo kya aata rangili ragani rangin rabab aata
mujhe ranginiyon mein rangane wo rangin sahab aata
labon ke mein pilane jhumata mast-e-shabab aata
yahin kheton mein pani ke kinaro yaad hai ab bhi
haya ke bojh se jab har qadam par lagazishen hotin
fazan mein muntasar rangin badan ke larazishen hotin
rabab-e-dil ke taron mein musalasil jumbishen hotin
khifa-e-raz ke purlutf baham koshishen hotin
yahin kheton mein pani ke kinare yaad hai ab bhi
bala-e-fikr-e-farda hum se koson dur hoti thi
surur-e-sarmadi se zindagi mamur hoti thi
hamari khilwat-e-masum rashq-e-tur hoti thi
malak jhula jhulate the gazal-khwan hur hoti thi
yahin kheton mein pani ke kinare yaad hai ab bhi
na ab wo khet baqi hain na wo aab-e-rawan baqi
magar us aish-e-rafta ka hai ik dhundala nishan baqi

Poet of the Poem/Ghazal or Nazam: Makhdoom Mohiuddin

wohi jhuki hui belen wohi daricha tha
magar wo phul-sa chehara nazar na aata tha
main laut aaya hun khamoshiyon ke sahara se
vahan bhi teri sada ka gubar phaila tha
qarib tair raha tha baton ka ek joda
main aabju ke kinare udas baitha tha
bani nahi jo kaheen par kali ke turbat thi
suna nahi jo kisi ne hawa ka nauha tha
ye aadi-tirchi lakiren bana gaya hai kon
main kya kahun ki mere dil ka varaq to sada tha
udhar se barha guzra magar khabar na hui
ki zer-e-sang khunuk paniyon ka chashma tha
wo us ka aks-e-badan tha ki chandani ka kanval
vi nili jhil thi ya aasaman ka tukada tha

Poet of the Poem/Ghazal or Nazam:  Shakeb Jalali

vahashat-e-dil sila-e-abalapai le le
mujh se ya rab mere lafzon ke kamai le le
aql har bar dikhati thi jale hath apne
dil ne har bar kaha aag parai le le
main to us subah-e-darakhshan ko tavangar janun
jo mere shahar se kashkol-e-gadai le le
tu gani hai magar itni hain sharayat meri
ye mohabbat jo hamen ras na aayi le le
apne divan ko galiyon me liye phirta hun
hai koi jo hunar-e-zakhmnumai le le

Poet of the Poem/Ghazal or Nazam: Ahmed Faraz

wafa ke shish mahal mein saja liya main ne
wo ek dil jise pathar bana liya main ne
ye soch kar ki na ho tak mein khushi koi
gamon ki ot mein khud ko chupa liya main ne
kabhi na khatm kiya main ne roshani ka muhaz
agar chirag bujha, dil jala liya main ne
kamal ye hai ki jo dushman pe chalana tha
wo tir apne kaleje pe kha liya main ne
‘qateel’ jisaki adavat mein ek pyar bhi tha
us aadmi ko gale se laga liya main ne

Poet of the Poem/Ghazal or Nazam: Qateel Shifai

wafa ke khwab muhabbat ka aasara le ja
agar chala hai to jo kuch mujhe diya le ja
maqam-e-sud-o-ziyan aa gaya hai phir janan
ye zakhm mere sahi tir to utha le ja
yahi hai qismat-e-sahara yahi karam tera
ki bund bund ata kar ghata ghata le ja
gurur-e-dost se itna bhi dilshikasta na ho
phir uth ke samane daman-e-iltaja le ja
nadamaten hon to sar bar-e-dosh hota hai
‘faraz’ jan ke evaz aabaru bacha le ja

Poet of the Poem/Ghazal or Nazam: Ahmed Faraz

wafa ke bhes mein koi raqib-e-shahar bhi hai
hazar! ke shahar ke qatil tabib-e-shahar bhi hai
wohi sipah-e-sitam khemazan hai charon taraf
jo mere bakht mein tha ab nasib-e-shahar bhi hai
udhar ke aag idhar bhi pahunch na jaye kaheen
hawa bhi tez hai jangal qarib-e-shahar bhi hai
ab us ke hijr mein rote hain us ke ghayal bhi
khabar na thi ke wo zalim habib-e-shahar bhi hai
ye raz nara-e-mansur hi se hum pe khula
ke chub-e-mimbar-e-masjid salib-e-shahar bhi hai
kadi hai jang ke ab ke muqabile pe ‘faraz’
amir-e-shahar bhi hai aur khatib-e-shahar bhi hai

Poet of the Poem/Ghazal or Nazam: Ahmed Faraz

kya kahun tum se main ke kya hai ishq
jan ka rog hai, bala hai ishq
ishq hi ishq hai jahan dekho
sare aalam mein bhar raha hai ishq
ishq mashuq ishq aashiq hai
yani apna hi mubtala hai ishq
ishq hai tarz-o-taur ishq ke tain
kaheen banda kaheen khuda hai ishq
kon maqsad ko ishq bin pahuncha
aarzoo ishq va mudda hai ishq
koyi khvahan nahi mohabbat ka
tu kahe jins-e-narawa hai ishq
meerji zard hote jate hain
kya kaheen tum ne bhi kiya hai ishq?

Poet of the poem/ghazal or Nazam: Meer Taqi Meer

meri teri nigah mein jo lakh intazar hain
jo mere tere tan badan mein lakh dil figar hain
jo meri teri ungaliyon ke behisi se sab qalam nazar hain
jo mere tere shahar ke har ik gali mein
mere tere naqsh-e-pa ke be-nishan mazar hain
jo meri teri raat ke sitare zakhm zakhm hain
jo meri teri subah ke gulab chak chak hain
ye zakhm sare be-dava ye chak sare be-rafu
kisi pe rakh chand ke kisi pe os ka lahu
ye hain bhi ya nahi bata
ye hai ki mahaz jal hai
mere tumhare ankabut-e-vaham ka buna hua
jo hai to is ka kya karen
nahi hai to bhi kya karen
bata, bata, bata, bata

Poet of the poem/ghazal or Nazam: Faiz Ahmed Faiz

kya khabar thi is tarah se wo juda ho jayega
khwab mein bhi us ka milana khwab sa ho jayega
zindagi thi qaid hamen kya nikaloge us se
maut jab aa jayegi to khud riha ho jayega
dost banakar us ko chaha, ye kabhi socha na tha
dosti hi dosti mein wo khuda ho jayega
us ka jalva hoga kya jisaka ke parda nur hai
jo bhi us ko dekh lega wo fida ho jayega

Poet of the poem/ghazal or Nazam: Rustom Sehgal Wafa

kya khabar thi ke main is darja badal jaunga
tujh ko kho dunga tere gham se sambhal jaunga
ajanabi ban ke milunga main tujhe mahafil mein
tu ne chedi bhi to main baat badal jaunga
dhundh paye na jahan yaad bhi teri mujh ko
aise jangal mein kisi roz nikal jaunga
zid mein aaye hue masum se bache ke tarah
khud hi kashti ko dubone pe machal jaunga

Poet of the poem/ghazal or Nazam:  Farhat Shahzad

kya sarokar ab kisi se mujhe
vasta tha to tha tujhi se mujhe
behisi ka bhi ab nahi ehasas
kya hua teri berukhi se mujhe
maut ke aarzoo bhi kar dekhun
kya ummiden thi zindagi se mujhe
phir kisi par na aitabar aaye
yun utaro na apne jee se mujhe
tera gham bhi na ho to kya jina
kuch tasalli hai dard hi se mujhe
kar gaye kis qadar tabah ‘zia’
dushman, andaz-e-dosti se mujhe

Poet of the poem/ghazal or Nazam: Zia Jalandhari