Ye kis khalish ne phir is dil mein aashiyana kiya
phir aj kis ne sukhan hum se gayebana kiya
gam-e-jahan ho, rukh-e-yar ho ke dast-e-udu
salook jis se kiya hum ne aashiqana kiya
the khak-e-rah bhi hum log qahar-e-tufan bhi
saha to kya na saha aur kiya to kya na kiya
khusha ke aj har ik muddai ke lab par hai
wo raz jis ne hamen rand-e-zamana kiya
wo hilagar jo vafaju bhi hai jafakhu bhi
kiya bhi “faiz” to kis but se dostana kiya

Poet of the Poem / Ghazal or Nazam : Faiz Ahmed Faiz

Tumhare shahar ka mausam bada suhana lage
main ek sham chura lun agar bura na lage
tumhare bas mein agar ho to bhool jao hamen
tumhen bhulane mein shayad mujhe zamana lage
hamare pyar se jalne lagi hai ye duniya
dua karo kisi dushman ki baddua na lage
na jane kya hai us ke bebak aankhon mein
wo muh chupa ke jaye bhi to bevafa lage
jo dubana hai to itane sukun se dubo
ke aas pas ke laharon ko bhi pata na lage
ho jis ada se mere sath bevafai kar
ke tere bad mujhe koi bevafa na lage
wo phul jo mere daman se ho gaye mansub
khuda kare unhen bazar ke hawa na lage
tum aankh mund ke pi jao zindagi ‘qaiser’
ke ek ghunt mein shayad ye badmaza na lage

Poet of the Poem / Ghazal or Nazam : Qaiser ul Jafri

Yun unaki bazm-e-khamoshiyon ne kam kiya
sab ne meri muhabbat ka ehataram kiya
hamara naam bhi lene laga wafa wale
hamen bhi aake farishton ne ab salam kiya
phir yahi khat, teri tasvir leke baith gaye
ye hum ne kam yahin subah aur sham kiya
zamana un ko hamesha hi ya rakhega
wo jisne ishq ke duniya mein apna naam kiya
tu bevafa hai magar mujhko jan se pyara hai
isi ada ne to ‘rahi’ ko tera gulam kiya

Poet of the Poem / Ghazal or Nazam : Saeed Rahi

Zamana aj nahi dagamaga ke chalne ka
sambhal bhi ja ki abhi waqt hai sambhalane ka
bahar aaye chali jaye phir chali aaye
magar ye dard ka mausam nahi badalne ka
ye thik hai ki sitaron pe ghum aaye hain
magar kise hai saliqa zamin pe chalne ka
phire hain raton ko aawara hum to dekha hai
gali gali mein saman chand ke nikalne ka
tamam nasha-e-hasti tamam kaif-e-vajud
wo ik lamha tere jism ke pighalne ka

Poet of the Poem / Ghazal or Nazam : Jan Nissar Akhtar

Zaban sukhan ko sukhan bankapan ko tarasega
sukhankada meri tarz-e-sukhan ko tarasega
naye pyale sahi tere daur mein saqi
ye daur meri sharab-e-kohan ko tarasega
mujhe to khair vatan chod ke aman na mili
vatan bhi mujh se garib-ul-vatan ko tarasega
unhin ke dam se farozan hain millaton ke charag
zamana sohabat-e-arabab-e-fan ko tarasega
badal sako to badal do ye bagban varana
ye bag saya-e-sard-o-saman ko tarasega
hava-e-zulm yahi hai to dekhana ek din
zamin pani ko suraj kiran ko tarasega

Poet of the Poem / Ghazal or Nazam : Nasir Kazmi

Tere bagair ye ab zindagi kahan guzri
qadam qadam pe tere sath ka guman guzri
ye din jo dhire se phisala to sham ke manzar
tere bagair udasi ke daramiyan guzri
wo ashk hun ki sar-e-rah gir gaya tha kabhi
utha saka na koi kitne karavan guzri
main khushk hoke bikharata raha hun pairon mein
bahut zamana hua mujh pe kashtiyan guzri
tere badan ka aalao ho meri sanson mein
kabhi wo lamha bhi ik bar jan-e-jan guzri
ye baat ab bhi nahi hai kisi se kahane ke
tamam sajde tere dar se rayagan guzri

Poet of the Poem / Ghazal or Nazam : Hafeez Aatish

Takra hi gai meri nazar un ke nazar se
dhona hi pada hath mujhe qalb-o-jigar se
izhar-e-mohabbat na kiya bas isi dar se
aisa na ho gir ja un kaheen un ke nazar se
ae zauq-e-talab josh-e-junun ye to bata de
jana hai kahan aur hum aaye hain kidhar se
‘fayyaz’ ab aaya hai junun josh pe apna
hansata hai zamana main guzarata hun jidhar se

Poet of the Poem /  Ghazal or Nazam: Faiyaz Hashmi

Na socha na samajha na sikha na jana
mujhe aa gaya khudbakhud dil lagana
zara dekh kar apna jalwa dikhana
simat kar yahin aa na jaye zamana
zuban par lagi hain wafaon ki muharen
khamoshi meri kah rahi hai fasana
gulon tak lagayi to aasan hai lekin
hai dushwar kanton se daman bachana
karo lakh tum matam-e-naujavani
pa ‘mir’ ab nahi aayega woh zamana

Poet of the Poem / Ghazal or Nazam : Meer Taqi Meer

khwabon mein tere gar meri khvahish nahi hogi
mujhase teri aankhon ke parastish nahi hogi
aavaz meri baith to sakati hai thakan se
lahaje mein agar mere guzarish nahi hogi
ho fikr jise khud wo mera hal parakh le
mujhase to mere gham ke numaish nahi hogi
mane ke na mane mujhe ‘shehzad’ zamana
ye tai hai ke mujh se koi sazish nahi hogi

Poet of the Poem / Ghazal or Nazam :Farhat Shehzad

Khuda ke vaste ab berukhi se kam na le
tadap ke phir koi daman ko tere tham na le
bas ek sajda-e-shukrana pa-e-nazuk par
ye maikada hai yahan par khuda ka naam na le
zamane bhar mein hain charche meri tabahi ke
main dar raha hun kaheen koi tera naam na le
mita do shauq se mujhko magar kaheen tumase
zamana meri tabahi ka intaqam na le
jise tu dekh le ik bar mast nazron se
wo umr bhar kabhi hathon mein apne jam na le
rakhun ummid-e-karam usase ab main kya “sahir”
ki jab nazar se bhi zalim mera salam na le

Poet of the Poem / Ghazal or Nazam : Sahir Bhopali

meri sham-e-gam ko wo bahala rahe hain
likha hai ye khat mein ki hum aa rahe hain
thahar ja zara aur dard-e-furqat
hamare tasavvur mein wo aa rahe hain

gam-e-aqabat hai na fikr-e-zamana
piye ja rahe hain jiye ja rahe hain

nahi shikava-e-tashnagi mayakashon ko
wo aankhon se maikhane barasa rahe hain
wo rashk-e-bahar aanevala hai “akhtar”
kanval hasaraton ke khile ja rahe hain

Poet of the Poem / Ghazal or Nazam : Akhtar Shirani

phir ek din aisa aayega
aankhon ke diye bujh jayenge
hathon ke kanval kumhalayenge
aur barg-e-zaban se nataq-va-sada
ke har titali ud jayegi
ik kale samandar ke tah mein
kaliyon ke tarah se khilati hui
phoolon ke tarah se hansati hui
sari shaklen kho jayengi
khoon ke gardish dil ke dhadakan
sab ranginiyan so jayengi
aur nili faza ke makhmal par
hansati hui hire ke ye kani
ye meri jannat meri zamin
is ke subahen is ke shamen
bejane hue besamajhe hue
ik musht gubar-e-insan par
shabanam ke ro jayengi
har cheez bhula di jayegi
yadon ke hasin butkhane se
har cheez utha di jayegi
phir koi nahi ye puchega
‘sardar’ kahan hai mahafil mein
lekin main yahan phir aaunga
bachon ke dahan se bolunga
chidiyon ke zaban se gaunga
jab bij hansenge dharati mein
aur konpalen apni ungali se
matti ke tahon ko chedengi
main patti patti kali kali
apni aankhen phir kholunga
sar sabz hatheli par lekar
shabanam ke qatre tulunga
main rang-e-hena aahang-e-gazal
andaz-e-sukhan ban jaunga
rukhsar-e-urus-e-nau ke tarah
har aanchal se chan jaunga
jadon ke havayen daman mein
jab fasal-e-khazan ko layengi
rahru ke jawan qadmon ke tale
sukhe hue patton se mere
hansane ke sadayen aayengi
dharati ke sunahari sab nadiyan
aakash ke nili sab jhilen
hasti se meri bhar jayengi
aur sara zamana dekhega
har qissa mera afsana hai
har aashiq hai saradar yahan
har mashuqa sultana hai
main ek gurezan lamha hun
ayyam ke afsunkhane mein
main ek tadapata qatra hun
masaruf-e-safar jo rehta hai
mazi ke surahi ke dil se
mustaqbil ke paimane mein
main sota hun aur jagata hun
aur jag ke phir so jata hun
sadiyon ka purana khel hun main
main mar ke amar ho jata hun

Poet of the Poem / Ghazal or Nazam :Ali Sardar Jafri

Garmi ka roz-e-jang ke kyon kar karun bayan
dar hai ke masl-e-shama na jalne lage zaban
wo lu ke alhazar! wo hararat ke alaman
ran ke zamin to surkh thi aur zard aasman
aab-e-khunak ko khalaq tarasati thi khak par
goya hawa se aag barasati thi khak par
wo lu wo aaftab ke shiddat wo tab-o-tab
kala tha rang dhup se din ka misal-e-shab
khud nahar-e-alqama ke bhi sukhe hue the lab
khaime jo the hababon ke tapate the sab ke sab
udati thi khak khushk tha chashma hayat ka
khaula hua tha dhup se pani farat ka
jhilon se charapaye na uthate the ta ba sham
maskin mein machalion ke samandar ka tha maqam
aahu jo kahile the to chite siyahfam
paththar pighal ke reh gaye the masl-e-mom kham
surkhi udi thi phoolon se sabzi gayah se
pani kuen mein utara tha saye ke chah se
koson kisi shajar mein na gul the na barg-o-bar
ek ek nakhal jal raha thasurat-e-chinar
hansata tha koi gul na lahakata tha sabazarar
kanta hui thisukh ke har shakh-e-bar dar
garmi ye thi ke zist se dil sab ke sard the
patte bhi masle-e-chehara-e-madquq zard the
aab-e-ravan se muh na uthate the janavar
jangal mein chipate phirate the tair idhar udhar
mardam the sat pardon ke andar araq se tar
khaskhana-e-mizhgan se nikalati na thi nazar
gar chashm se nikal kar thahar jaye reh mein
par jayen lakh aablepa-e-nigah mein
sher uthate the na dhup ke mare kachar se
aahu na muh nikalate the sabzazar se
aaina mahar ka tha muqaddar gubar se
gardun ko tap chadi thi zamin ke bukhar se
garmi se muztarib tha zamana zamin par
bhun jata tha jo girata tha dana zamin par
girdab par tha shola-e-javala ka guman
angare the habab to pani sharar fishan
muh se nikal padi thi har ek maujki zaban
tah par the sab nihang magar thi labon pe jan
pani tha aag garmi-e-roz-hisab thi
mahi jo sikh-e-mauj tak aayi kabab thi
aaina-e-falak ko na thi tab-o-tab ke tab
chipane ko barq chahati thi daman-e-sahab
sab ke siva tha garm mizajon ko iztirab
kafur-e-subah dhundhata phirta tha aaftab
bhadaki thi aag gumbad-e-charkh-e-asir mein
badal chipe the sab kurrah-e-zamharir mein

Poet of the Poem / Ghazal or Nazam : Babar Ali Anees

masjidon ke sahan tak jana bahut dushvar tha
der se nikala to mere raste mein dar tha
apne hi phailao ke nashe mein khoya tha darakht
aur har masum tahani par phalon ka bar tha
dekhte hi dekhte shaharon ke raunaq ban gaya
kal yahi chehara tha jo har aaine pe bar tha
sab ke dukh sukh us ke chehare pe likhe paye gaye
aadmi kya tha hamare shahar ka akhabar tha
ab mohalle bhar ke daravazon pe dastak hai nasib
ek zamana tha ke jab main bhi bahut khuddar tha
kagazon ke sab siyahi barishon mein dhul gai
hum ne jo socha tere bare mein sab bekar tha

Poet of the Poem / Ghazal or Nazam :Rahat Indori

jivan kya hai chalata phirta ek khilona hai
do aankhon mein ek se hansana ek se rona hai
jo jee chahe wo mil jaye kab aisa hota hai
har jivan jivan jine ka samajhauta hai
ab tak jo hota aaya hai wo hi hona hai
raat andheri bhor suhani yahi zamana hai
har chadar mein dukh ka tana sukha ka bana hai
aati sans ko pana jati sans ko khona hai

Poet of the Poem / Ghazal or Nazam :Nida Fazli