Haq wafa ka jo hum jatane lage – Altaf Husain Hali
haq wafa ka jo hum jatane lage
aap kuch keh k muskurane lage
hum ko jina padega furqat mein
wo agar himmat aazamane lage
dar hai meri zuban na khul jaye
ab wo baten bahut banane lage
jan bachati nazar nahi aati
gair ulfat bahut jatane lage
tum ko karana padega uzr-e-jafa
hum agar dard-e-dil sunane lage
bahut mushkil hai sheva-e-taslim
hum bhi aakhir ko jee churane lage
vaqt-e-rukhsat tha sakht “hali” par
hum bhi baithe the jab wo jane lage
Poet of the Poem / Ghazal or Nazam :Altaf Husain Hali