Sar jo mahafuz hon unake, to rida bhi mangen
hath uthane ke sakat ho to dua bhi mangen
abhi zakhmon ke numaish ka hai insan ka vajud
jism ko jism banalen to qaba bhi mangen
ae ke tu tiragi-e-shab, ke hamari umid
koi dahaliz ata kar to diya bhi mangen
maut se bhi koi umid nahi hai “meraj”
hum jo zinda hon to marane ke dua bhi mangen
Poet of the Poem / Ghazal or Nazam : Meraj Faizabadi
Tere bare mein jab socha nahi tha
main tanha tha magar itna nahi tha
teri tasvir se karta tha baten
mere kamare mein aaina nahi tha
samandar ne mujhe pyasa hi rakha
main jab sehra mein tha pyasa nahi tha
manane-ruthane ke khel mein hum
bichad jayenge ye socha nahi tha
suna hai band kar li us ne aankhen
kai raton se wo soya nahi tha
Poet of the Poem / Ghazal or Nazam : Meraj Faizabadi
Tavil sadiyon ke besada manzaron se pucho
meri tabahi ke dastan pattharon se pucho
tumhare mahalon ke shan-o-shaukat bhi aarazi hain
hamare mazi ka kya hua, maqabaron se pucho
zaruraton ne zuban par pahare bitha diye hain
jo hum pe guzri hamare ujade gharon se pucho
Poet of the Poem / Ghazal or Nazam : Meraj Faizabadi
hum gazal mein tera charcha nahi hone dete
teri yadon ko bhi rusava nahi hone dete
kuch to hum khud bhi nahi chahate shoharat apni
aur kuch log bhi aisa nahi hone dete
azamaten apne charagon ke bachane ke liye
hum kisi ghar mein ujala nahi hone dete
mujhko thakane nahi deta ye zaroorat ka pahad
mere bache mujhe budha nahi hone dete
Poet of the Poem / Ghazal or Nazam : Meraj Faizabadi
ek tuti hui zanjir ki fariyad hain hum
aur duniya ye samajhati hai ki aazad hain hum
kyon hamen log samajhate hain yahan paradesi
ik muddat se isi shahar mein aabad hain hum
kahe ka tark-e-vatan kahe ki hijarat baba
isi dharti ki isi desh ki aulad hain hum
hum bhi tamir-e-vatan mein hain barabar ki sharik
dar-o-divar agar tum ho to buniyad hain hum
hum ko is daur-e-taraqqi ne diya kya “meraj”
kal bhi barbad the aur aj bhi barbad hain hum
Poet of the poem/ghazal or Nazam: Meraj Faizabadi
Bekhvab sa’aton ka parastar kon hai
itani udas raat mein bedar kon hai
kis ko ye fiqr ke qabile ko kya hua
sab is pe lad rahe hain ki saradar kon hai
divar par saja to diye bagiyon ke sar
ab ye bhi dekh lo ki pas-e-deevar kon hai
sab kashtiyan jala ke chale sahilon se hum
ab tum se kya batayen ke us par kon hai
ye faisala to shayad waqt bhi na kar sake
sach kon bolata hai adakar kon hai
Poet of the Poem / Ghazal or Nazam :Meraj Faizabadi
charag apne thakan ke koi safai na de
wo tiragi hai ke ab khwab tak dhikhai na de
bahut satate hain rishte jo tut jate hain
khuda kisi ko bhi taufiq-e-ashanai na de
main sari umr andheron mein kat sakata hun
mere diyon ko magar raushani parai na de
agar yahi teri duniya ka hal hai malik
to meri qaid bhali hai mujhe rihai na de
dua ye mangi hai sahame hue mu’arrik ne
ke ab qalam ho khuda surkh raushnai na de
Poet of the poem/ghazal or Nazam: Meraj Faizabadi
Bad gaya tha pyas ka ehasas dariya dekh kar
hum palat aaye magar pani ko pyasa dekh kar
hum bhi hain shayad kisi bhataki hui kashti ke log
chikhane lagate hain khvabon mai jazira dekha kar
jis ke jitani haisiyat hai usake nam utana khulus
bhik dete hain yahan ke log kasa dekh kar
mangate hain bhik ab apne muhallon mai faqir
bhuk bhi muhatat ho jati hai khatra dekh kar
khudkushi likhi thi ek beva ke chehare par magar
phir wo zinda ho gayi bacha bilakata dekh kar
Poet of the Poem / Ghazal or Nazam : Meraj Faizabadi