Wo dil navaz hai nazar shanas nahi
mera ilaj mere charagar ke pas nahi
tadap rahe hain zaban par kai saval magar
mere liye koi shayan-e-iltamas nahi
tere ujalon mein bhi dil kanp kanp uthta hai
mere mizaj ko aasudagi bhi ras nahi
kabhi kabhi jo tere qurb mein guzri the
ab un dinon ka tasavvur bhi mere pas nahi
guzar rahe hain ajab marhalon se dida-o-dil
sahar ke aas to hai zindagi ke aas nahi
mujhe ye dar hai ki teri aarzoo na mit jaye
bahut dinon se tabiyat meri udas nahi

Poet of the Poem / Ghazal or Nazam : Nasir Kazmi

Ye bhi kya sham-e-mulaqat aayi
lab pe mushkil se teri baat aayi
subah se chup hain tere hijr nasib
haye kya hoga agar raat aayi
bastiyan chod ke barase badal
kis qayamat ke ye barsat aayi
koi jab mil ke hua tha rukhsat
dil-e-betab wohi raat aayi
saya-e-zulf-e-butan mein ‘nasir’
ek se ek nai raat aayi

Poet of the Poem / Ghazal or Nazam :Nasir Kazmi

Tu hai ya tera saya hai
bhesh judai ne badala hai
dil ke haveli par muddat se
khamoshi ka qufl pada hai
chikh rahe hain khali kamare
sham se kitni tez hawa hai
daravaze sar phod rahe hain
kon is ghar ko chod gaya hai
hichaki thamati hi nahi ‘nasir’
aj kisi ne yaad kiya hai

Poet of the Poem / Ghazal or Nazam : Nasir Kazmi

Wo sahilon pe gane wale kya hue
wo kashtiyan jalne wale kya hue

wo subah aate aate reh gai kahan
jo qafile the aane wale kya hue

main jin ke reh dekhata hun raat bhar
wo roshni dikhane wale kya hue
ye kon log hain mere idhar udhar
wo dosti nibhane wale kya hue
imaraten to jal ke rakh ho gain
imaraten banane wale kya hue

ye aap hum to bojh hain zamin ka
zamin ka bojh uthane wale kya hue

Poet of the Poem / Ghazal or Nazam : Nasir Kazmi

Tere khayal se lau de uthi hai tanhai
shab-e-firaq hai ya teri jalvaarai
tu kis khayal mein hai ae manzilon ke shadai
unhen bhi dekh jinhen raste mein neend aayi
pukar ae jaras-e-karavan-e-subah-e-tarab
bhatak rahe hain andheron mein tere saudai
rah-e-hayat mein kuch marhale to dekh liye
ye aur baat teri aarzoo na ras aayi
ye saniha bhi muhabbat mein barha guzra
ki us ne hal bhi pucha to aankh bhar aayi
phir us ke yaad mein dil beqarar hai ‘nasir’
bichad ke jis se hui shahar shahar rusavai

Poet of the Poem / Ghazal or Nazam : Nasir Kazmi

Safar-e-manzil-e-shab yaad nahi
log rukhsat huye kab yaad nahi
dil mein har waqt chubhan rahati thi
thi mujhe kis ke talab yaad nahi
wo sitara thi ke shabanam thi ke phul
ik surat thi ajab yaad nahi
aisa ulajha hun gam-e-duniya mein
ek bhi khvab-e-tarab yaad nahi
bhulate jate hain mazi ke dayar
yaad aayen bhi to sab yaad nahi
ye haqiqat hai ke ahabab ko hum
yaad hi kab the ke ab yaad nahi
yaad hai sair-e-charagan “nasir”
di ke bujhane ka sabab yaad nahi

Poet of the Poem / Ghazal or Nazam : Nasir Kazmi

Tere milane ko bekal ho gaye hain
magar ye log pagal ho gaye hain
baharen leke aaye the jahan tum
wo ghar sunsan jangal ho gaye hain
yahan tak badh gaye aalam-e-hasti
ki dil ke hausale shal ho gaye hain
kahan tak tab laye natavan dil
ki sadame ab musalsal ho gaye hain
nigah-e-yas ko neend aa rahi hai
musarda purashk bojhal ho gaye hain
unhen sadiyon na bhulega zamana
yahan jo hadase kal ho gaye hain
jinhen hum dekh kar jite the ‘nasir’
wo log aankhon se ojhal ho gaye hain

Poet of the Poem / Ghazal or Nazam : Nasir Kazmi

Zaban sukhan ko sukhan bankapan ko tarasega
sukhankada meri tarz-e-sukhan ko tarasega
naye pyale sahi tere daur mein saqi
ye daur meri sharab-e-kohan ko tarasega
mujhe to khair vatan chod ke aman na mili
vatan bhi mujh se garib-ul-vatan ko tarasega
unhin ke dam se farozan hain millaton ke charag
zamana sohabat-e-arabab-e-fan ko tarasega
badal sako to badal do ye bagban varana
ye bag saya-e-sard-o-saman ko tarasega
hava-e-zulm yahi hai to dekhana ek din
zamin pani ko suraj kiran ko tarasega

Poet of the Poem / Ghazal or Nazam : Nasir Kazmi

Phir savan rut ke pavan chali tum yaad aaye
phir patton ke pazeb baji tum yaad aaye
phir kunjen bolin ghas ke hare samandar mein
rut aayi peele phoolon ke tum yaad aaye
phir kaga bola ghar ke sune aangan mein
phir amrat ras ke bund padi tum yaad aaye
pahale to main chikh ke roya aur phir hansane laga
badal garja bijli chamaki tum yaad aaye
din bhar to main duniya ke dhandhon mein khoya raha
jab deewaron se dhup dhali tum yaad aaye

Poet of the Poem / Ghazal or Nazam : Nasir Kazmi

Kisi kali ne bhi dekha na aankh bhar ke mujhe
guzar gai jaras-e-gul udas kar ke mujhe
main so raha tha kisi yaad ke shabistan mein
jaga ke chod gaye qafile sahar ke mujhe
main ro raha tha muqaddar ke sakht rahon mein
uda ke le gaya jadu teri nazar ka mujhe
main teri dard ke tugiyaniyon mein dub gaya
pukarate rahe tare ubhar ubhar ke mujhe
tere firaq ke raten kabhi na bhulengi
maze mile inhin raton mein umr bhar ke mujhe
zara si der thaharne de ae gam-e-duniya
bula raha hai koi bam se utar ke mujhe
phir aj aayi thi ik mauj-e-hava-e-tarab
suna gai hai fasane idhar-udhar ke mujhe

Poet of the Poem / Ghazal or Nazam : Nasir Kazmi

Kon is reh se guzarata hai
dil yun hi intazar karta hai
dekh kar bhi na dekhane wale
dil tujhe dekh-dekh darta hai
shahar-e-gul mein kati hai sari raat
dekhiye din kahan guzarata hai
dhyan ke sidiyon pe pichale pahar
koi chupke se panv dharata hai
dil to mera udas hai ‘nasir’
shahar kyon sayen-sayen karta hai

Poet of the Poem / Ghazal or Nazam : Nasir Kazmi

hoti hai tere naam se vahshat kabhi kabhi
barham hui hai yun bhi tabiyat kabhi kabhi
ae dil kise nasib ye taufiq-e-iztirab
milati hai zindagi mein ye rahat kabhi kabhi
tere karam se ae alam-e-husn-e-afrin
dil ban gaya hai dost ke khilvat kabhi kabhi
dil ko kahan nasib ye taufiq-e-iztirab
milati hai zindagi mein ye rahat kabhi kabhi
josh-e-junun mein dard ke tugayaniyon ke sath
ashkon mein dhal gai teri surat kabhi kabhi
tere qarib rah ke bhi dil mutamain na tha
guzri hai mujh pe bhi ye qayamat kabhi kabhi
kuch apana hosh tha na tumhara khayal tha
yun bhi guzar gai shab-e-furqat kabhi kabhi
ae dost hum ne tark-e-muhabbat ke bavajud
mahasus ke hai teri zarurat kabhi kabhi

 
Poet of the Poem / Ghazal or Nazam : Nasir Kazmi

Dukh ke lahar ne cheda hoga
yaad ne kankad phenka hoga
aj to mera dil kehta hai
tu is waqt aakela hoga
mere chume hue hathon se
auron ko khat likhata hoga
bhig chalin ab raat ke palaken
tu ab thak kar soya hoga
rel ke gahari sinti sun kar
raat ka jangal gunja hoga
shahar ke khali steshan par
koi musafir utara hoga
aangan mein phir chidiyan bolen
tu ab so kar utha hoga
yadon ke jalti shabanam se
phul sa mukhada dhoya hoga
moti jaisi shaql banakar
aaine ko takata hoga
sham hui ab tu bhi shayad
aapane ghar ko lauta hoga
nili dhundhali khamoshi mein
taron ke dhun sunata hoga
mera sathi sham ka tara
tujh se aankh milta hoga
sham ke chalte hath ne tujh ko
mera salam to bheja hoga
pyasi kurlati kunjun ne
mera dukh to sunaya hoga
main to aj bahut roya hun
tu bhi shayad roya hoga
‘nasir’ tera mit purana
tujh ko yaad to aata hoga

Poet of the Poem / Ghazal or Nazam : Nasir Kazmi

giriftadil hain bahut aj tere divane
khuda kare koi tere siva na pahachane
miti miti si ummiden thake thake se khayal
bujhe bujhe se nigahon mein gham ke afasane
hazar shukr ke hum ne zuban se kuch na kaha
ye aur baat ke pucha na ahal-e-duniya ne
baqadr-e-tashnalabi pursish-e-vafa na hui
chalak ke rah gaye teri nazar ke paimane
khayal aa gaya mayus rahguzaron ka
palat ke aa gaye manzil se tere divane
kahan hai tu ke tere intazar mein ae dost
tamam raat sulagte rahe dil ke virane
ummid-e-pursish-e-gam kis se kijiye ‘nasir’
jo mere dil pe guzarati hai koi kya jane

Poet of the poem/ghazal or Nazam: Nasir Kazmi

Dil mein ik lahar si uthi hai abhi
koi taza hawa chali hai abhi
shor barpa hai khana-e-dil mein
koi divar si giri hai abhi
kuch to nazuk mizaj hain hum bhi
aur ye chot bhi nai hai abhi
bhari duniya mein jee nahi lagata
jane kis cheez ke kami hai abhi
tu sharik-e-sukhan nahi hai to kya
ham-sukhan teri khamoshi hai abhi
yaad ke be-nishan jaziron se
teri aavaz aa rahi hai abhi
shahar ke becharag galiyon mein
zindagi tujh ko dhundhati hai abhi
so gaye log us haveli ke
ek khidaki magar khuli hai abhi
tum to yaro abhi se uth baithe
shahar mein raat jagti hai abhi
waqt acha bhi aayega ‘nasir’
gham na kar zindagi padi hai abhi

Poet of the Poem / Ghazal or Nazam : Nasir Kazmi