Ye kya jane mein jana hai, jate ho khafa hokar
main tab janu mere dil se chale jao juda hokar
qayamat tak udegi dil se uthakar khak aankhon tak
isi raste gaya hai hasaraton ka kafila hokar
tumhin ab dard-e-dil ke naam se ghabraye jate ho
tumhin to dil mein shayad aaye the dard-e-ashiyan hokar
yun hi hamdam ghadi bhar ko mila karte to bahatar tha
ke dono waqt jaise roz milate hain juda hokar

Poet of the Poem / Ghazal or Nazam : Seemab Akbarabadi

Ye kya muqam hai wo nazare kahan gaye
wo phul kya huye wo sitare kahan gaye
yaran-e-bazm-e-jurr’at-e-rindana kya hui
un mast ankhadiyon ke ishare kahan gaye
ek aur daur ka wo taqaza kidhar gaya
umade huye wo hosh ke dhare kahan gaye
uth uth ke baith chuki gard reh ke
yaro qafile thake hare kahan gaye
betab tere dard se the charagar “hafeez”
kya janiye wo dard ke mare kahan gaye

Poet of the Poem / Ghazal or Nazam : Hafeez Jullundhri

Tu nahi to zindagi main aur kya reh jayega
dur tak tanhaiyon ka silsila reh jayega
kijiye kya guftagu kya un se mil kar sochiye
dil-shikasta khvahishon ka zayaqa reh jayega
dard ke sari tahen aur sare guzri hadase
sab dhuan ho jayenge ek vaqiya reh jayega
ye bhi hoga wo mujhe dil se bhula dega magar
yun bhi hoga khud usi mein ek khala reh jayega

dayar-e-inkar ke iqarar ke saragoshiyan
ye agar tute kabhi to fasala reh jayega

Poet of the Poem / Ghazal or Nazam : Iftikhar Imam Siddiqui

Tumhen bhool jaun ye hota nahi
koi waqt ho dard sota nahi
na ho jao badnam tum is liye
main ro ro ke daman bhigota nahi
ye wo fasl hai jo uge khud-ba-khud
koi dard ke bij bota nahi
ye mana ke tufan ka zor hai
main ghabara ke kashti dubota nahi

Poet of the Poem / Ghazal or Nazam : Zaheer Anwar

Yar tha gulzar tha bad-e-saba thi main na tha
layaq-e-pa-bos-e-jan kya hina thi main na tha
hath kyon bandhe mere challa agar chori hua
ye sarapa shokhi-e-rang-e-hina thi main na tha
main ne pucha kya hua wo aap ka husn-o-shabab
hans ke bola wo sanam shan-e-khuda thi main na tha
main sisakata reh gaya aur mar gaye farahad-o-qais
kya unhin donon ke hisse mein qaza thi main na tha

Poet of the Poem / Ghazal or Nazam : Bahadur Shah Zafar

Tum nagma-e-mah ho anjum ho tum soz-e-tamanna kya jano
tum dard-e-muhabbat kya samajho tum dil ka tadapana kya jano
sau bar agar tum ruth gaye hum tum ko mana hi lete the
ik bar agar hum ruth gaye tum hum ko manana kya jano
takhrib-e-muhabbat aasan hai tamir-e-muhabbat mushkil hai
tum aag lagana sikh gaye tum aag bujhana kya jano
tum dur khade dekha hi kiye aur dubne vala dub gaya
sahil ko tum manzil samajhe tum lazzat-e-dariya kya jano

Poet of the Poem / Ghazal or Nazam : Behzad Lucknawi

Tum ko hum dil mein basa lenge tum aao to sahi
sari duniya se chupa lenge tum aao to sahi
ek wada karo ab hum se na bhichadoge kabhi
naz hum sare utha lenge tum aao to sahi
bevafa bhi ho sitamagar bhi jafapesha bhi
hum khuda tum ko bana lenge tum aao to sahi
yun to jis simt nazar uthati hai tariki hai
pyar ke dip jala lenge tum aao to sahi
ikhtalafat bhi mit jayenge rafta rafta
jis tarah hoga nibha lenge tum aao to sahi
dil ke virani se ghabarake na muh ko modo
bazm ye phir se saja lenge tum aao to sahi
reh tarik hai aur dur hai manzil lekin
dard ke shamaen jala lenge tum aao to sahi

Poet of the Poem / Ghazal or Nazam : Mumtaz Mirza

Pyar mujhase jo kiya tumane to kya paogi
mere halat ke aandhi mein bikhar jaogi
ranj aur dard ke basti ka main bashinda hun
ye to bas main hun ke is hal mein bhi zinda hun
khwab q dekhun wo kal jisape main sharminda hun
main jo sharminda hua tum bhi to sharamaogi
q mere sath koi aur pareshan rahe
meri duniya hai jo viran to viran rahe
zindagi ka ye safar tumako to aasan rahe
hamasafar mujhko banaogi to pachataogi
ek main kya abhi aayenge divane kitne
abhi gunjege muhabbat ke tarane kitne
zindagi tumako sunayegi fasane kitne
q samajhati ho mujhe bhool nahi paogi

Poet of the Poem / Ghazal or Nazam : Javed Akhtar

Tujh ko aate hi nahi chupane ke andaz abhi
mere sine mein hain larzan teri aavaz abhi
us ne dekha hi nahi dard ka aagaz abhi
ishq ko apni tamannaon pe hai naz abhi
tujh ko manzil pe pahunchane ka hai dawa hamdam
mujh ko anjam nazar aata hai aagaz abhi
kis qadar gosh-bar-avaz hai khamoshi-e-shab
koi nala ki hai fariyad ka ka darbaz koi
mere chehare ke hansi rang-e-shikasta mera
tere ashkon mein ‘tabassum’ ka hai andaz abhi

Poet of the Poem / Ghazal or Nazam : Sufi Ghulam Mustafa Tabassum

Shayad main zindagi ke sahar leke aa gaya
qatil ko aj apne hi ghar leke aa gaya
ta-umr dhundhata raha manzil main ishq ke
anjam ye ki gard-e-safar leke aa gaya
nashtar hai mere hath men, kandhon pe maiqada
lo main ilaj-e-dard-e-jigar leke aa gaya
‘fakir’ sanamakade mein na aata main lautakar
ik zakhm bhar gaya tha idhar leke aa gaya

Poet of the Poem / Ghazal or Nazam : Sudarshan Faakir

Sau bar chaman mahaka sau bar bahar aayi
duniya ke wohi raunaq dil ke wohi tanhai
har dard-e-muhabbat se ulajha hai gam-e-hasti
kya kya hamen yaad aaya jab yaad teri aayi
dekhe hain bahut hum ne hangame muhabbat ke
aagaz bhi ruswai anjam bhi ruswai

ye bazm-e-muhabbat hai is bazm-e-muhabbat mein
divane bhi saudai farzane bhi saudai

Poet of the Poem / Ghazal or Nazam : Sufi Ghulam Mustafa Tabassum

Tha mustear husn se usake jo nur tha
khurshid mein bhi us hi ka zarra-e-zahur tha
pahuncha jo aap ko to main pahuncha khuda ke tain
malum ab hua ki bahot main bhi dur tha
kal panv ek kasa-e-sar par jo aa gaya
yak-sar wo istakhvan shikaston mein choor tha
kahane laga ke dekh ke chal reh be-khabar
main bhi kabhu kisu ka sar-e-pur-gurur tha
tha wo to rashk-e-hur-e-bahishti hamin mein ‘meer’
samajhe na hum to feham ka apne qasur tha

Poet of the Poem / Ghazal or Nazam : Meer Taqi Meer

Teri zad se nikalana chahata hai
ye dariya rukh badalana chahata hai
wo sapana jis ke surat hi nahi hai
meri aankhon mein chalana chahata hai
dilon ke mandagi pe kya ta’ajjub
ki suraj bhi to dhalana chahata hai
nashist-e-dard badali hai to ab dil
zara pehlu badalana chahata hai
mujhe bhi samana hai karbala ka
mera sar bhi uchalana chahata hai
nahi hai tarjuman-e-gam ye aansu
ye pani ab ubalana chahata hai
tabassum zer-e-lab kehta hai ‘amjad’
koi jazba machalana chahata hai

Poet of the Poem / Ghazal or Nazam : Amjad Islam Amjad

Teri umeed tera intazar jab se hai
na shab ko din se shikayat na din ko shab se hai
kisi ka dard ho karte hain tere naam raqam
gila hai jo bhi kisi se teri sabab se hai
hua hai jab se dil-e-nasabur beqabu
kalam tujhase nazar ko badi adab se hai
agar sharar hai to bhadake, jo phul hai to khile
tarah tarah ke talab tere rang-e-lab se hai
kahan gaye shab-e-furqat ke jaganevale
sitara-e-sahar ham-kalam kab se hai

Poet of the Poem / Ghazal or Nazam : Faiz Ahmed Faiz

Samajha tha main mujhe kisi qabil bana diya
ye kya kiya ki dard ko phir dil bana diya
gham ne tagaiyurat ke qabil bana diya
jo dard apni had se badha dil bana diya
itane mugalate diye ummid-o-bim ne
sahil ko mauj mauj ko sahil bana diya
itni kadi nigah se dekha na kijiye
har rishta-e-nazar ko rag-e-dil bana diya
ye kya banane wale tere jee mein aa gai
bijli bana raha tha magar dil bana diya
har zarra rahguzar ka to hira nahi ‘siraj’
jis mein salahiyat thi use dil bana diya

Poet of the Poem / Ghazal or Nazam : Siraj Lucknawi