Sitaron se aage jahan aur bhi hain
abhi ishq ke imtihan aur bhi hain
tahi zindagi se nahi ye fazayen
yahan saikadon karavan aur bhi hain
kana’at na kar aalam-e-rang-o-bu par
chaman aur bhi, aashiyan aur bhi hain
agar kho gaya ek nasheman to kya gham
maqamat-e-ah-o-fugan aur bhi hain
tu shahin hai parwaz hai kam tera
tere samane aasman aur bhi hain
isi roz-o-shab mein ulajh kar na reh ja
ke tere zamin-o-makan aur bhi hain
gae din ke tanha tha main anjuman mein
yahan ab mere razdan aur bhi hain

Poet of the Poem / Ghazal or Nazam : Allama Iqbal

Tum aj hanste ho hans lo mujh par ye aazamaish na bar bar hogi
main jana ta hun mujhe khabar hai ki kal faza khushagavar hogi
rahe muhabbat mein zindagi bhar rahegi ye kashamakash barabar
na tumako qurabat mein jit hogi na mujhko furaqat mein har hogi
hazar ulfat sataye lekin mere iradon se hai ye mumakin
agar sharafat ko tumane cheda to zindagi tum pe var hogi

Poet of the Poem / Ghazal or Nazam : Khwaja Mir Dard

Shola tha jal-bujha hun havayen mujhe na do
main kab ka ja chuka hun sadayen mujhe na do
jo zeher pi chuka hun tumhin ne mujhe diya
ab tum to zindagi ke duayen mujhe na do
aisa kaheen na ho ke palatakar na aa sakun
har bar dur ja ke sadayen mujhe na do
kab mujh ko aiteraf-e-muhabbat na tha ‘faraz’
kab main ne ye kaha tha sazayen mujhe na do

Poet of the Poem / Ghazal or Nazam : Ahmed Faraz

Tohamaten chand apne zimme dhar chale
jis liye aaye the so hum kar chale
zindagi hai ya koi tufan hai
hum to is jine ke hathon mar chale
kya hamen kam is gulon se ae saba
ek dam aaye idhar udhar chale
dosto dekha tamasha yan ka sab
tum raho khush hum to apne ghar chale
aah bas jee mat jala tab janiye
jab koi afsun tera us par chale
shama ke manind hum is bazm mein
chashm-nam aaye the daman-tar chale
dhundhate hain aap se usako pare
shekh sahib chod ghar bahar chale
hum jahan mein aaye the tanhavale
sath apne ab use lekar chale
jun sharar ae hasti-e-bebud yan
bare hum bhi apni bari bhar chale
ek main dil resh hun vaisa hi dost
zakhm kitanon ka suna hai bhar chale
hum na jane paye bahar aap se
wo bhi aade aa gaya jidhar chale
saqiya yan lag raha hai chal chalao
jab talak bas chal sake sagar chale
“dard” kuch malum hai ye log sab
kis taraf se aaye the kidhar chale

Poet of the Poem / Ghazal or Nazam : Khwaja Mir Dard

Tod kar uthe hain jam-o-shisha-o-paimana hum
kis se kah den aj raz-e-gardish-e-mastana hum
bijaliyan ruposh tufan dam bakhud sahara khamosh
ja rahe hain kis taraf ae lagzish-e-mastana hum
zindagi ik mustaqil sharah-e-tamanna thi magar
umr bhar teri tamanna se rahe begana hum
tujh mein bhi kuch hosh-mandana adayen aa gain
tujh se bhi ab badaguman hain ae dil-e-divana hum
khushk aankhen dil shikasta ruh tanha lab khamosh
bastiyon se dekhte hain surat-e-virana hum
hum tak ab aaye na aaye daur-e-paimana “ravish”
mutamain baithe hain zer-e-saya-e-maikhana hum

Poet of the Poem / Ghazal or Nazam : Ravish Siddiqui

Shayad main zindagi ke sahar leke aa gaya
qatil ko aj apne hi ghar leke aa gaya
ta-umr dhundhata raha manzil main ishq ke
anjam ye ki gard-e-safar leke aa gaya
nashtar hai mere hath men, kandhon pe maiqada
lo main ilaj-e-dard-e-jigar leke aa gaya
‘fakir’ sanamakade mein na aata main lautakar
ik zakhm bhar gaya tha idhar leke aa gaya

Poet of the Poem / Ghazal or Nazam : Sudarshan Faakir

Tharthari si hai aasamanon mein
zor kuch to hai natavanon mein
kitna khamosh hai jahan lekin
ik sada aa rahi hai kanon mein
koi soche to farq kitna hai
husn aur ishq ke fasanon mein
maut ke bhi ude hain aksar hosh
zindagi ke sharabkhanon mein
jin ke tamir ishq karta hai
kon rehta hai un makanon mein
inhin tinakon mein dekh ae bulbul
bijaliyan bhi hain aashiyanon mein

Poet of the Poem / Ghazal or Nazam : Firaq Gorakhpuri

Sar se chadar badan se qaba le gai
zindagi hum faqiron se kya le gai
meri mutthi mein sukhe huye phul hain
khushbuon ko udakar hawa le gai
main samundar ke sine mein chattan tha
raat ek mauj aayi baha le gai
hum jo kagaz the ashkon se bhige huye
kyon chiragon ke lau tak hawa le gai
chand ne raat mujhko jaga kar kaha
ek ladaki tumhara pata le gai
meri shoharat siyasat se mahafus hai
ye tavayaf bhi ismat bacha le gai

Poet of the Poem / Ghazal or Nazam : Bashir Badr

Sar pe saya sa dast-e-dua yaad hai
apne aangan mein ik ped tha yaad hai
jis mein apni parindon se tashbih thi
tum ko skul ke wo dua yaad hai
aisa lagata hai har imtahan ke liye
zindagi ko hamara pata yaad hai
maikade mein azan sun ke roya bahut
is sharabi ko dil se khuda yaad hai
main purani haveli ka parda mujhe
kuch kaha yaad hai kuch suna yaad hai

Poet of the Poem / Ghazal or Nazam : Bashir Badr

Teri mahafil se uthakar ishq ke maron pe kya guzri
mukhalif ik jahan tha jane becharon pe kya guzri
sahar ko rukhsat-e-bimar-e-furqat dekhane valo
kisi ne ye bhi dekha raat bhar taron pe kya guzri
suna hai zindagi viraniyon ne lut li milakar
na jane zindagi ke nazbaradaron pe kya guzri
hansi aayi to hai bekaif si lekin khuda jane
mujhe masarur pakar mere gamkhvaron pe kya guzri
asir-e-gam to jan dekar rihai pa gaya lekin
kisi ko kya khabar zindan ke deewaron pe kya guzri

Poet of the Poem / Ghazal or Nazam : Shakeel Badayuni

Teri duniya mein ya rab zist ke saman jalate hain
fareb-e-zindagi ke aag mein insan jalate hain
dilon mein azamat-e-tauhid ke dipak fasurda hain
jabinon par riya-o-kubr ke saman jalate hain
havas ke barayabi hai khirad-mandon ke mahafil mein
rupahali tikaliyon ke ot mein iman jalate hain
havadis raqs-farma hain qayamat muskurati hai
suna hai nakhuda ke naam se tufan jalate hain
shagufe jhulate hain is chaman mein bhuk ke jhule
baharon mein nasheman to bahar-e-unavan jalatae hain
kaheen aazeb ke chan-chan mein majboori tadapati hai
riya dam tod deti hai sunehre dan jalate hain
manao jashn-e-may-noshi bikharao zulf-e-mayakhana
ibadat se to “sagar” dahar ke shaitan jalate hain

Poet of the Poem / Ghazal or Nazam : Sagar Siddiqui

Tere pas aane ko jee chahata hai
naye zakhm khane ko jee chahata hai
idhar aaye shayad wo mauj-e-tarannum
gazal gungunane ko jee chahata hai
zamana mera aazamaya hua hai
tujhe aazamane ko jee chahata hai
wohi baat reh reh ke yaad aa rahi hai
jise bhool jane ko jee chahata hai
labon par mere khelata hai tabassum
jab aansu bahane ko jee chahata hai
kai martaba dil pe bijli giri hai
magar muskurane ko jee chahata hai
takalluf na kar aj barq-e-tajalli
nasheman jalne ko jee chahata hai
rukh-e-zindagi se naqaben ulat kar
haqiqat dikhane ko jee chahata hai

Poet of the Poem / Ghazal or Nazam : Sikander Ali Wajd

Sakut-e-sham mitao bahut andhera hai
sukhan ke shama jalao bahut andhera hai
dayar-e-gam mein dil-e-beqarar chut gaya
sambhal ke dhudhane jao bahut andhera hai
ye raat wo ke sujhe jahan na hath ko hath
khayalo dur na jao bahut andhera hai
laton ko chehare pe dale wo so raha hai kaheen
zaya-e-rukh ko churao bahut andhera hai

havayen nim shabi hon ki chadar-e-anjum
naq aab rukh se uthao bahut andhera hai

shab-e-siyah mein gum ho gai hai rah-e-hayat
qadam sambhal ke uthao bahut andhera hai
guzashta ahd ke yadon ko phir karo taza
bujhe chirag jalao nahut andhera hai

thi ek uchakati hui neend zindagi usaki
‘firaq’ ko na jagao bahut andhera hai

Poet of the Poem / Ghazal or Nazam : Firaq Gorakhpuri

Zindagi mein to sabhi pyar kiya karte hain
main to mar kar bhi meri jan tujhe chahunga
tu mila hai to ye ehasas hua hai mujhko
ye meri umr mohabbat ke liye thodi hai
ik zara sa gam-e-dauran ka bhi haq hai jis par
main ne wo sans bhi tere liye rakh chodi hai
tujh pe ho jaunga quraban tujhe chahunga
apne jazbat mein nagmat rachane ke liye
main ne dhadakan ke tarah dil mein basaya hai tujhe
main tasavvur bhi judai ka bhala kaise karun
main ne qismat ke lakiron se churaya hai tujhe
pyar ka ban ke nigehaban tujhe chahunga
teri har chap se jalate hain khayalon mein chirag
jab bhi tu aaye jagata hua jadu aaye
tujh ko chu lun to phir ae jan-e-tamanna mujhko
der tak apne badan se teri khushbu aaye
tu baharon ka hai unawan tujhe chahunga

Poet  of  the Poem / Ghazal or Nazam :Qateel Shifai

Zindagi se badi saza hi nahi
aur kya jurm hai pata hi nahi
itane hisson mein baat gaya hun main
mere hisse mein kuch bacha hi nahi
sach ghate ya bade to sach na rahe
jhooth ke koi inteha hi nahi
jad do chandi mein chahe sone mein
aaina jhooth bolata hi nahi

Poet  of  the Poem / Ghazal or Nazam :Krishan Bihari Noor