Na jana aj tak kya shai khushi hai
hamari zindagi bhi zindagi hai
tere gham se shikayat-si rahi hai
mujhe sach-much badi sharmindagi hai
mohabbat mein kabhi socha hai yun bhi
ki tujh se dosti ya dushamani hai
koi dam ka hun mehaman muh na phero
abhi aankhon mein kuch kuch roshani hai
zamana zulm mujh par kar raha hai
tum aisa kar sako to baat bhi hai
jhalak masumiyon mein shokhiyon ke
bahut rangin teri sadagi hai
ise sun lo sabab is ka na pucho
mujhe tum se mohabbat ho gai hai
suna hai ik nagar hai aansuon ka
usi ka dusara naam aankh bhi hai
wohi teri mohabbat ke kahani
jo kuch bhuli hui kuch yaad bhi hai
tumhara zikr aaya ittefaqan
na bigado baat par baat aa gai hai

Poet of the Poem / Ghazal or Nazam : Firaq Gorakhpuri

samane hai jo use log bura kahate hain
jisako dekha hi nahi usako khuda kahate hain
zindagi ko bhi sila kahate hain kahanevale
jinevale to gunahon ke saza kahate hain
fasale umr ke kuch aur bada deti hai
jane q log use phir bhi dawa kahate hain
chand masum se patton ka lahu hai “fakir”
jisako mahbub ke hathon ke hina kahate hain

Poet of the Poem / Ghazal or Nazam : Sudarshan Faakir

sagar se lab laga ke bahut khush hai zindagi
sahan-e-chaman mein aake bahut khush hai zindagi
aa jao aur bhi zara nazadik jan-e-man
tum ko qarib pake bahut khush hai zindagi
hota koi mahal bhi to kya puchate ho phir
be-vajah muskura ke bahut khush hai zindagi
sahil pe bhi to itni shagufata ravish na thi
tufan ke bich aake bahut khush hai zindagi
viran dil hai aur “adam” zindagi ka raqs
jangal mein ghar banake bahut khush hai zindagi

Poet of the / Ghazal or Nazam :Abdul Hameed Adam

Khub pehchan lo asrar hun main
jins-e-ulfat ka talabgar hun main
ishq hi ishq hai duniya meri
fitana-e-aql se bezar hun main
chedati hai jise mizarab-e-alam
saz-e-fitarat ka wohi tar hun main
aib jo hafiz-o-khayyam mein tha
han kuch is ka bhi gunahgar hun main
zindagi kya hai gunah-e-adam
zindagi hai to gunahgar hun main
meri baton mein masihai hai
log kahate hain ki bimar hun main
ek lapakata hua shola hun main
ek chalati hui talavar hun main

Poet of the Poem / Ghazal or Nazam : Majaz Lucknawi

navak andaz jidhar dida-e-janan honge
nim-bismil kai honge kai bejan honge
tab-e-nazara nahi aaina kya dekhane dun
aur ban jayenge tasvir jo hairan honge
tu kahan jayegi kuch apna thikana kar le
hum to kal khvab-e-adam mein shab-e-hijaran honge
phir bahar aayi wohi dasht-e-navardi hogi
phir wohi paon wohi khar-e-mugelan honge
nasiha dil mein tu itna to samajh apne ke hum
lakh nadan huye kya tujh se bhi nadan honge
ek hum hain ke huye aise pasheman ke bas
ek wo hain ke jinhen chah ke arman honge
minnat-e-hazarat-e-isa na uthayenge kabhi
zindagi ke liye sharminda-e-ehasan honge
umr to sari kati ishq-e-butan mein “momin”
ab aakhiri waqt mein kya khak musalaman honge

Poet of the Poem / Ghazal or Nazam : Momin Khan Momin

nama gaya koi na koi namabar gaya
teri khabar na aayi zamana guzar gaya
hansata hun yun ki hijr ke raten guzar gain
rota hun yun ki lutf-e-dua-e-sahar gaya
ab mujh ko hai qarar to sab ko qarar hai
dil kya thahar gaya ki zamana guzar gaya
ya rab nahi main vaqif-e-rudad-e-zindagi
itna hi yaad hai ki jiya aur mar gaya

Poet of the Poem / Ghazal or Nazam : Seemab Akbarabadi

mujhe deke mein mere saqiya meri tashnagi ko hawa na de
meri pyas par bhi to kar nazar mujhe maikashi ke saza na de
mera sath ae mere hamsafar nahi chahata hai to jam de
magar is tarah sar-e-rahguzar mujhe har qadam pe sada na de
mera gham na kar mere charagar teri charajoi baja magar
mera dard hai meri zindagi mujhe dard-e-dil ke dawa na de
main vahan hun ab mere naseha ki jahan khushi ke guzar nahi
mera gham hadon se guzar gaya mujhe ab khushi ke dua na de
wo girayen shauq se bijaliyan ye sitam karam hain sitam nahi
ke wo ‘tarz’ barq-e-jafa nahi jo chamak ke nur-e-vafa na de
mujhe deke mein mere saqiya meri tashnagi ko hawa na de
meri pyas par bhi to kar nazar mujhe maikashi ke saza na de
mera sath ae mere hamsafar nahi chahata hai to jam de
magar is tarah sar-e-rahguzar mujhe har qadam pe sada na de
mera gham na kar mere charagar teri charajoi baja magar
mera dard hai meri zindagi mujhe dard-e-dil ke dawa na de
main vahan hun ab mere naseha ki jahan khushi ke guzar nahi
mera gham hadon se guzar gaya mujhe ab khushi ke dua na de
wo girayen shauq se bijaliyan ye sitam karam hain sitam nahi
ke wo ‘tarz’ barq-e-jafa nahi jo chamak ke nur-e-vafa na de

 Poet of the Poem / Ghazal or Nazam :Ganesh Bihari Tarz

Khush rahe ya bahut udas rahe
zindagi tere aas pas rahe
chand in badaliyon se nikalega
koi aayega dil ko aas rahe
hum muhabbat ke phul hain shayad
koi kanta bhi aas pas rahe
mere sine mein is tarah bas ja
meri sanson mein teri bas rahe
aj hum sab ke sath khub hanse
aur phir der tak udas rahe

Poet of the Poem / Ghazal or Nazam : Bashir Badr

muhabbaton mein dikhave ke dosti na mila
agar gale nahi milta to hath bhi na mila
gharon pe naam the namon ke sath ohade the
bahut talash kiya koi aadmi na mila
tamam rishton ko main ghar pe chod aaya tha
phir isake bad mujhe koi ajanabi na mila
bahut ajeeb hai ye qurbaton ke duri bhi
wo mere sath raha aur mujhe kabhi na mila
khuda ke itni badi qayanat mein main ne
bas ek shakhs ko manga mujhe wo hi na mila

Poet of the Poem / Ghazal or Nazam :Bashir Badr

Hawa ke aavaz
khushk patton ke sarsarahat se bhar gai
rosh-rosh par fatada phoolon ne
lakhon nauhe jaga diye hain
sileti shuayen
buland pedon par gul machate
siyah kauon ke qafilon se ati hui hain
har ek janib khizan ke qasid lapak rahe hain
har ek janib khizan ke aavaz gunjati hai
har ek basti kashakash-e-marg-o-zindagi se nidhal hokar
musafiron ko pukarati hai ki – aao
mujh ko khizan ke bemahar
talkh ehasas se bachao

Poet of the Poem / Ghazal or Nazam : Munir Niazi

mom ke zindagi ghula karana
kuch kisi se na tazakara karana
mera bachpan tha aaine jaisa
har khilona ka mun taka karana
chehara chehara meri kitaben hain
padhane valo mujhe padha karana
ye rivayat bahut purani hai
neend mein ret par chala karana
raste mein kai khandar honge
shah-savaro vahan ruka karana
jab bahut hans chuko to chehare ko
aansuon se bhi dho liya karana
phul shakhon ke hon ki aankhon ke
raste raste chuna karana

Poet of the Poem / Ghazal or Nazam :Bashir Badr

mit gaya jab mitane vala phir salam aaya to kya
dil ke barbadi ke bad un ka payam aaya to kya
chut gain nabzen ummiden dene vali hain javab
ab udhar se namabar leke payam aaya to kya
aj hi mitana tha ae dil hasarat-e-didar mein
tu meri nakamiyon ke bad kam aaya to kya
kash apni zindagi mein hum ye manzar dekhte
ab sar-e-turbat koi mahashar-khiram aaya to kya
sans ukhadi aas tuti cha gaya jab rang-e-yas
namabar laya to kya khat mere naam aaya to kya
mil gaya wo khak mein jis dil mein tha arman-e-did
ab koi khurshid-vash bala-e-bam aaya to kya

 
Poet of the Poem / Ghazal or Nazam :Dil Shahjahanpuri

kya hua tera har ik roz mujhe khat likhana
aur khat mein dil-e-betab ke halat likhana
meri khatir shab-e-furqat mein na sona tera
meri yadon mein pareshan sa hona tera
aur phir khat mein shab-e-hijr ke babat likhana
kya hua tera har ik roz mujhe khat likhana
wo sar-e-sham khayalon mein mere kho jana
aur phir khud hi tera sharmsar ho jana
wo akele mein mujhe pyar bhara khat likhana
kya hua tera har ik roz mujhe khat likhana
kis liye tod diye tune sabhi ahad-e-vafa
kya hue wade muhabbat ke bata kuch to bata
kis liye chod diya tu ne mujhe khat likhana
kya hua tera har ik roz mujhe khat likhana

Poet of the poem/ghazal or Nazam: UnKnown

meri zindagi pe na muskara mujhe zindagi ka alam nahi
jise tere gham se ho vasta wo khizan bahar se kam nahi
mera kufr hasil-e-zud hai mera zud hasil-e-kufr hai
meri bandagi wo hai bandagi jo rahin-e-dair-o-haram nahi
mujhe ras aaye khuda kare yahi ishtibah ke saaten
unhen aitabar-e-vafa to hai mujhe aitabar-e-sitam nahi
wohi karavan wohi raste wohi zindagi wohi marahale
magar apane-apane muqam par kabhi tum nahi kabhi hum nahi
na wo shan-e-jabr-e-shabab hai na wo rang-e-qahar-e-itab hai
dil-e-beqarar pe in dinon hai sitam yahi ki sitam nahi
na fana meri na baqa meri mujhe ae ‘shakeel’ na dhundiye
main kisi ka husn-e-khayal hun mera kuch vujud-o-adam nahi

Poet of the Poem / Ghazal or Nazam : Shakeel Badayuni

meri zindagi kisi aur ki, mere naam ka koi aur hai
mera aks hai sar-e-aina, pase aaina koi aur hai
meri dhadakanon mein hai chap si, ye judai bhi hai milap si
mujhe kya pata, mere dil bata, mere sath kya koi aur hai
na gae dinon ko khabar meri, na sharik-e-hal nazar teri
tere des men, mere bhes men, koi aur tha koi aur hai
wo meri taraf nigaran rahe, mera dhyan jane kahan rahe
meri aankh mein kai suraten, mujhe chahata koi aur hai

Poet of the Poem / Ghazal or Nazam : Muzaffar Warsi